من مراسلات: الخوت بغيت نعاود لكم قصتي مع المخزن

 نعاود لكم قصتي مع المخزن
السلام الخوت المهم العام الفايت تسجلت فالتكوين المهني او ملي وصلات وقت القراية تلاقيت مع واحد المخازني قاليا واش بغيتي دخل المخزن ندخلك ...
قلت ليه اه قاليا خاصك تعطيني دابا مليون اوملي تجيبلك الكونفوكاسيو تكملي 2 د المليون اونص ..قلت ليه والله اسيدي معندي هاد الساعة ريال ممكن تيق فيا غير نكمل الصطاج اونعطيك فلوسك ...
قال ليا لا خاصك تعطيني الفلوس باش نعطيهم للكولونيل ... المهم قلت ليه واش فايت لك دخلتي شي حد قاليا دخلتهوم حتى دابا راه كاينين دراري معاش غاتمشي ل أولوز دوزوا ...قلت ليه خاصك تلاقيني مع هاد الدراري المههم مشيت تعرفت عليهم ولقيت واحد فيهم عندوغير الاولى اعدادي او قصير بزاف ... المهم صافي قلت الادخل هاد الدري ليمعندوش القراية او الطول يعني عندو ما يكول ... صافي مشيت الدار او قلتها الوالدين اومشيت البنكة شديت عندهم مليون ...
ديت لداك السيد الوريقات ديالي او الفلوس قاليا 4 ايام تجيك كونفوكاسيو صافي مشيت واحد 5 ايام هاكاك جابليا الاستدعاء او عطيتو مليون انص  تسلفتها من العائلة .. المهم صاوبت الوريقات او بديت كنوجد راسي اولي وصل النهار فاش غانمشي قاليا راه راه مكاينش الكلونيل ف القشلة راه مشا الرباط مكاين لي ادخلك للقشلة
المهم قاليا صبر واحد 10 ايام او نجيبلك كونفوكاسيو جديدة
جاب لي الكونفوكاسيو عاوتاني اوجدت راسي او المسائل قاليا تسنى متمشيش فالكار الليل غاديك لأولوز ف طوموبيلتي قلت ليه صافي
وصلات العشية قاليا راه مغاديش نمشيو حيت واحد الدري خاصاه واحد الوريقة مزال مصاوبها
قلت اخر مرا دير معايا هاكا المهم تخاريت انا وياه قاليا صافي اخر مرا
جاب ليا كونفوكاسيو عاوتاني ( كنقول مع راسي منين كايجيوه لي كونفوكاسيو طاح فيا الشك )  وصل داك النهار او جا الدار مع دوك الدراري صافي هزيت اوصاكي اومشينا لمجاعرة ماشي اولوز حيت قاليا ميمكنش حخلو نتوما ف اولوز حيت نتوما من الشمال
 ماشي مشكيل المهم غير ندخلو ماشي مهم فين واخا اكون داعش ههه مشينا وصلنا مكناس بتنا تما قالينا ديك 9 دالصباح ايهضر معانا الكولونيل صافي وصلات 9 هضر نعاه الكولونيل قاليه متجيوش اليوم حتا لغدا واجيو
ناض الصداع عوتاني المهم صبرنا عاود او  بتنا فمكناس ملي وصل الصباح شدين الطريق لمجاعرة وصلنا او مشينا لواهد القهوة اون فاص مع القشلة اقسم بالله الا حسيت بواحد ااالاحساس م واعر شفنا تما الدراري كا يصطاجيو المهم كتنسناو الكولونيل اخرج عندنا ادخلنل شويا هضر معا داك المخزني قاليه راه ميمنكنش ادخلو دابا حيت كاينا اللجنة قاليه حتا الاتنين
جلسنا ف المجاعرة 3 ايام كنباتو غير ف الطوموبيل او تكرفصنا المهم وصلات الاتنين كنسناو تما او هضرات معايا الوالدة ديال واحد الدري هو من الرشيدية مشا هوا لأولوز قالت ليا رجعو بحالكم راه مكاين والو راه طحنا فالشفار او النصاب قلت لها كيفاش المهم قلت لداك المخازني يا ندخلو اليوم يا عطيني فلوسي قال ليا  راه غدرني الكولونيل او.كدا ياله نرجعكوم لمكناس
 المهم رجعنا لمكناس او هضرت مع الوالدة ديال داك الدري قلت ليه محمد واش رجع من اولو ولا لا قالت ليل لا راه قالهم حتى الخميس ادخلهوم وصل الخميس صافي وقالو لنا راه دخلو الدراري او فرحت اورجع ليا الامل  قاليا داك المخازني غير صبر حتا نتوما غادي دخلو المهم واحد 5 ايام هضرات معايا الوالدة ديال دام الدري قالت ليا او هيا كتبكي اجيو بحالكو راه محمد جراو عليه راه شاد الكار للراشيدية قلت لها علاش قالت ليا راه ديك الكونفوكاسيو لي كان كايعطيوكم راه مزورين
المهم طلع ليا الدم الوالدة كتبكي مشاو الفلوس او ماشي ديولنا غير مسلفينهم
 المهم مشيت لداك السيد قلت ليه فلوسي اتجبدو لهنا ولا الدوارة ديالك نجبدهالك المهم مشا واحد السيمانا مابغاش اردهوم قلت ليه هاني جاي القشلة فين خدام او جايب ليك دوك لي كونفوكاسيو نوريهم لشاف ديالك صافي السيد تخلع او كيقفقف قاليا عنداك دير هاليا تخرج عليا اوعلى خدمتي المهم مشيت كنقلب على الوالدين ديال داك السيد او لقيتهو ناس الله اعمرها دار صافي قالو ليا غير سير فلوسك اجيوك لدار
الحمد الله الفلوس رجعو ليا او بغيت نقولكم الخوت عنداكم تقولبة كاين لي ادبر عليك عندك تسبق الفلوس عندك

المخزني من مدينة راشدية اصل ديالو من ارفود